Pace è salute per 2022

 

À l’orlu di l’annu novu, vogliu mandà, à tutte, à tutti, i mio auguri di salute è di felicità.

Pensu in particulare à quelli chì campanu in una cellula di prigione o una stanza d’uspitale.

Pensu à e donne, à l’omi, à i zitelli, chì stanu in a precarità è e privazione di tuttu, in una situazione resa più pessima chè mai da a crisa sanitaria.

Pensu à e famiglie in dolu.

Pensu à l’anziani isulati, privi d’amore è di scambii umani.

Pensu à i giovani, chì a so più bella età si trova affoscata da u cuntestu presente.

Pensu à quelli chì soffrenu, in Corsica è altrò.

Pensu dinù à l’attori di a salute, chì strazianu in stu mumentu per fà vince e forze di a vita.

À tutti, chì l’annu novu li porti cunfortu è benistà, incù a vuluntà umana è l’aiutu di a pruvidenza.

À quelli chì anu oghje a carica di e respunsabilità pulitiche in Corsica, li precu di circà ciò chì c’hè di più bonu in elli stessi, è di truvà a forza di serve solu l’interessu superiore di a nazione.

À tutte, à tutti, à i Corsi è à l’altri, precu a pace, a salute, a libertà, a felicità è l’amore !

Campate felici !

Evviva a nazione !

Evviva a Corsica !