Pace, salute è vuluntà

Hè ghjuntu 2014. Tuttu ognunu si dumanda ciò ch’ellu purterà, è presenta i so auguri di pace è di salute, cum’è s’ellu ùn si pudia fà di più: precà è aspetta… Hè capita chì certe cose cum’è a salute ùn si cumandanu micca. Ci vole, cum’ellu si dice, à precà si la bona. Ma per l’altru restu, ùn basta à precà. Simu donne è omi. Vale à dì chè no simu rispunsevuli di a nostra sorte, è di a sorte di l’altri umani dinù. U mondu cum’ellu và ùn vi cunvene? Ancu di grazia! Cosa cuntate di fà per cambià lu? Ùn basta à palisà l’inghjustizia s’ellu ùn si face nunda per a ghjustizia. Voi dite ch’ella vi stumaca a pulitica? Chì eresia! Vi ponu stumacà certi puliticanti, quessa sì. Ma a pulitica chì riguleghja a vita cumuna di l’esseri umani? Ùn fate micca pulitica? Ùn ne vulete mancu sente parlà? Peghju, d’addisperu site pronti à seguità à certi chì vi pruponenu cum’è solu prugramma l’odiu di l’altru, chì vi insegnanu di u ditu quellu disgraziatu chì cerca à stantà si un pezzu di pane? Chì trappula! Mentre chì d’altri s’approntanu à caccià vi fora d’ind’è voi incù a forza di u soldu… Svegliate vi! È fate a pulitica ghjusta, indiate vi d’un modu o di l’altru: “quale ella sia a manera”… Ma sempre incù u ghjudiziu!

M’indirizzeraghju più particularmente à i naziunali. Cosa aspettemu per fà campà a nazione? Dipoi qualchì mese, sapemu chì l’idee naziunale anu annaquatu tutta a sucetà corsa. Avà toccanu ancu quelli chì ùn si dicenu micca naziunali! L’ultimi voti di l’Assemblea di Corsica a facenu vede chjaramente. Ci vole à piglià cuscenza chì l’affari anu cambiatu completamente incù issi voti. L’Assemblea di Corsica ùn pò fà a lege? Quale hè chì dice què? Parigi? Ah, ci hè a custituzione francese prutetta da u so cunsigliu di vechje zucche? Chì leghjitimità averanu per noi una custituzione straniera è un cunsigliu di nemichi di i Corsi? Mi pare à mè chì u solu dirittu chì s’imponghi à noi sia quellu fattu da i Corsi. L’altru ùn hà nisunu altru fundamentu chì a forza, è a cunquista di u 1769. Ma què, ghjè una quistione di fattu è micca di dirittu. D’un cantu, ci hè una nazione di dirittu naturale è di l’altru a “ragiò di u più forte” di u XVIIIu seculu… Allora lascemu rachjà quelli chì ci parlanu di l’articuli di e lege francese… Ùn vale à dì chì ùn ci vole micca à circà à regulà i nostri raporti incù a Francia. Ci sò discussione per què è serà, à un mumentu datu, quistione di raporti di forza pulitichi… Ma u più impurtante, per avà, hè di cunsiderà chì e nostre decisione anu digià forza di lege.

Or dunque, ciò ch’ellu si pò dì in issu principiu di 2014, ghjè chì i riprisententi leghjittimi di a Corsica anu resu a lingua corsa ufficiale nantu à u territoriu corsu. Altra affare: 46 eletti corsi nantu à 51 anu dettu chì a custituzione francese, cum’ell’ hè fatta, hè cuntraria à l’interessi di a Corsica. Per via di què, sta custituzione ùn la pudemu micca ricunnosce, noi altri Corsi. A conclusione logica di sti custati evidenti hè quessa custì: u duvere di ogni Corsu hè di mette in ballu ogni ghjornu e decisione di l’isituzione corse è, quant’ellu si pò, d’uppone si à l’appiecazione di e norme francese cuntrarie à i nostri interessi cullettivi. Què vale per tutti i nostri cumpatriotti ma sopra à tuttu per quelli chì anu responsabilità pulitiche è amministrative.

Ciò ch’aghju scrittu custì, ùn si pudia micca dì annu, chì tandu ùn esitianu micca isse decisione ufficiale di l’istituzione corse. Dunque, s’è no vulemu, 2014 serà u primu annu di a nostra libertà ricunquistata.

Avà ch’aghju dettu tuttu què, manderaghju un salutu fraternu à i nostri prigiuneri è à e so famiglie. È pò, à tutte è à tutti, precheraghju, incù fede è incù affettu: pace, salute, amore, ghjudiziu è… vuluntà!