Cuncorsu di puesia corsa è gallurese di a cumuna di Sta Teresa di Gallura (Lungoni)

Puesie premiate di a 19a edizione (dicembre 2013)

Categuria puesia corsa (ghjuria: Petru Leca è Jean-Marie Arrighi)

- Michel Solinas, per “I versi d’amori”
- Stefanu Conca , per “Una notte incù tè”
- Jean-Guy Talamoni, per “Anniversariu”

Categuria puesia gallurese (ghjuria Angela Antona, Franco Fresi è Piero Bardanzellu)
- Gianfranco Garrucciu, per “Maistrali di meli”
- Anna Maria Raga, per “Bunaccia in canali”
- Maddalenina Alba Leoni, per “A misura di sgurdu”

Anniversariu

À Anghjulu Maria

Un annu chè tù sì pertutu,

Circhemu indarru a to presenza.

A notte hè bughja, u mare mutu.

Di lu Fiumorbu, la cuscenza

Eri tù, è, di la saetta

Ne fusti lu maestru altieru ;

È di la machja, è d’a filetta,

L’innamuratu più sinceru.

Un annu chè tù sì pertutu,

Eppuru, sì quì issa sera,

Si sguassa stu dulore acutu.

A to memoria bianca è nera,

È la to voce, è lu to visu,

È tutte le stonde passate…

Avà ‘ssu tesoru indivisu

Schjariscerà e nostre strade.

Ghjuvan Guidu Talamoni

Issu premiu hè dedicatu à a memoria di Anghjulu Maria è à i mio amichi Fiumurbacci.