“Libera me”: Una BD nantu à u Fronte è l’IRA

Hè isciuta in u cummerciu a prima parte di una trilugia nantu à isse duie urganisazioni clandestine. A trama hè di u nostru amicu Frédéric Bertocchini, d’Alta Frequenza, è di l’Irlandese Miceal O’ Griafa, i disegni di Michel Espinosa, è i culori di Pascal Nino. Si tratta di una finzione, ma u fondu storicu hè statu travagliatu assai, ancu s’è l’autori ùn volenu parlà d’un opera storica ma d’un “thriller puliticu”. Facenu vede, isse pagine, e lotte, e speranze è i sacrifizii di dui populi chì ùn sò mai stati sottumessi da a forza straniera. Ci ramentanu dinù a crudeltà di Thatcher, a speranza di i naziunali corsi quandu “i Pinzuti anu elettu à François Mitterrand presidente di a so republica”, cum’ellu dice un persunagiu…

Compia issa prima parte (“Ribelli”), aspettemu incù impazienza i dui tomi chì anu da seguità: “Clandestini” è “Guerrieri”.

Un bellu travagliu, à leghje per amparà o per ramintà si.

O simpliciamente per u piacè.

G. G. Talamoni

Libera me, 1. “Ribelli”, DCL éditions, 2012.