Storia - U perdonu di Gavini
Quante volte hè statu vittima di a penna scherzosa di Santu Casanova, u deputatu Bastianu Gavini ! Leghjite puru issi versi, stratti da u primu numaru di A Tramuntana1 :
« Stu ghjurnale parlarà,
Cù molta stima ed onori,
Di li nostri ciarlattani
Diputati è sinatori
Ch’à dì ci la quì trà noi
Sò uni pochi d’impustori.
Parlarà di Casabianca,
Lu diputatu d’Alandu,
Di u fratellu sinatore,
Un omu di contrabandu ;
Cù Bastianu Gavini
Ch’hè prontu à lu so cummandu.
L’altru fratellu Gavini
Hè moltu amicu d’Arena,
Un omu di Cabinettu
Ch’hà la mente assai sirena.
L’affari andaranu bene
Finchì a borsa sarà piena.(…) »
O quessi custì, publicati dinù in A Tramuntana è mintuvati, in 1911, da Austin de Croze in lu so libru La chanson populaire de l’île de Corse2 :
« À Manziù Arena, Diputatu.
Voi chì sete u capimachja
È lu primu ciarlattanu,
Di li nostri diputati,
Tutti degni di lu zanu ;
Ascultate un tantinellu
I detti d’un paisanu.
Sò ch’è parlu à un patriottu
À la moda di Pilatu,
Chì nun pensa à nisun Corsu,
S’ellu ùn hè qualchì cugnatu,
È ch’ùn s’arricorda più
Di u locu duv’ellu hè natu.
(…)
Scrivaraghju anc’à Gavini,
In dialettu ginuvese,
Ellu chì pare surtitu
Da u ventre di stu paese !
Ma in pulitica purtantu
Ùn guarda mai le spese. »
Poche baterchjate ! Eppuru, trent’anni dopu, nantu à a longa lista, publicata in 1927 da a rivista U Fucone3, di quelli chì participavanu à a sottuscrizzione per a publicazione di l’opera di Santu Casanova, si pudia leghje u nome di... Bastianu Gavini, “anzianu deputatu”!
Hè quantu à vede à Emiliu Zuccarelli o à Camellu de Rocca Serra “sponsorizà” U Ribombu incù i so danari persunali...
I puliticanti ùn sò più ciò chì elli eranu !
Ghjuvan Guidu Talamoni
Numaru 1u, l’11 d’ottobre di u 1896.
Librairie Honoré Champion, Paris, 1911, p. 77.
Nantu à issa lista, ci sò persunalità è eletti assai diversi cum’è E. Sari, senatore è merre; A. Landry, anzianu ministru, deputatu; F. Coty, direttore di u “Figaro”; F. Pietri, deputatu, sottu secretariu di Statu à u bilanciu; S. Sabiani, Consigliu generale di Marseglia; V. de Moro-Giafferi, anzianu ministru, deputatu... (U Fucone, Nu 2, numaru speciale “Santu Casanova”, p. 89).
