In Londra, nantu à i passi di Paoli

 (Publicatu in A Nazione in nuvembre 2007)

Eramu cinquanta cinque Corsi in Londra, à rifà i passi di u generale Pasquale Paoli, per a cummemurazione di a so morte. Issu pelegrinagiu era urganizatu da Stella Castela, Silvia Casalta, Ghjuvan Petru Defendini, Pasquale Valentini. Duiecent’ anni dopu à a disparizione di u Babbu di a Patria, più di cent’ anni dopu à u so ritornu in Corsica, u nostru populu ùn s’hè micca scurdatu di quellu chì fù u nostru Capu di Statu è u primu ind’u mondu à mette in ballu una Republica muderna, incù una custituzione è a spiccanza di i puderi. Sè a Francia ùn ricunnosce l’impurtanza di a so opera (si ramenta omu chè u cunsigliu municipale di Parigi ùn hà vulsutu, qualchì mese fà, dà u so nome à una piazzetta), l’inguilterra, ella, hà stallatu in lu so panteone, in l’abbazia di Westminster, u bustu di u nostru generale.

Ùn fù una cosa simplice, di fà sente in issu locu u nostru innu naziunale « Diu vi salvi Regina ». Ci hè vulsutu à neguzià incù l’autorità religiose inglese. Ma quesse, cusciente di a forza simbolica di issu viaghju, anu datu u so accunsentu.

Cusì, adduniti intornu à u bustu è a lastra posta in memoria di Pasquale Paoli, li avemu resu un umagiu cummuvente, dui zitellucci tinendu a bandera corsa è i cantadori, quelli di « Barbara furtuna » è Ceccè Butteau, fendu risunà quelle armunie care in issi lochi tracarchi di storia…

Tutti quelli chì anu participatu à issa ceremonia a teneranu in mente per u sempre.

Ghjuvan Guidu Talamoni