Antichi

L’imperatore è filosofu rumanu Marcu Aureliu dicia chì ci vulia sempre ad avè davant’à l’ochji un anzianu chì fussi statu perfettamente virtuosu. Mà perchè un anzianu ? Di sicuru, Marcu Aureliu pensava chì l’anziani eranu assai più onesti è astuti chè noi. E ùn hè micca statu u solu à pensà cusì. I libri di storia sò tracarchi di referenze à a saviezza di l’antichi, à i valurosi antenati, eccetera. Hè capita, u saviu d’Ascu hè mortu dipoi un bellu pezzu, è mi pare ch’ellu ùn abbia avutu nisunu eredu ricunnisciutu, nè in Ascu, nè in Bastia, nè in Casalabriva !

Eppuru, circandu bè ind’i listessi libri, si ponu truvà dinù uni pochi d’antichi chì sò stati perfetti imbecilli. D’altronde, sè l’anziani ùn s’eranu mai sbagliati, u mondu serebbe appena più ghjustu ch’ellu hè avà. Perchè e bestialità, ùn anu micca principiatu a settimana scorsa ! U sumerisimu ùn hè micca natu eri, chì ne dite ? Eppò, tutti l’autori ùn sò micca d’accunsentu incù Marcu Aureliu. Per contu soiu, Descartes dicia : « Ùn ci vole micca à inchinassi davanti à l’anziani per via di u fattu ch’elli sò antichi. In realità, l’anziani simu noi. U mondu hè più vechju avà chè in li tempi landani, è dunque avemu noi di e cose una spirienza più grande. » In listessu sensu, Pascal scrivia : « Quelli chè no’ chjamemu anziani eranu propiu nuvelli in ogni cosa… » In quant’à Brassens, cantava ellu : « U tempu ùn hà nunda à chì vede in st’ affare : quandu omu hè c… » Allora, à quale ci vole à crede, Marcu Aureliu o Brassens ? Eiu, scegliu à Brassens. Ùn ci credu mancu appena à stu pruverbiu chì dice : « Ogni leva peghjura », cum’è se e nove generazione ùn eranu bone à nunda ! Eppò sapete, issu pruverbiu hè prupaganda : sò sempre i vechji chì l’anu in bocca ! Eiu, quessu, ùn l’aghju mai dettu. Infine, ùn l’aghju mai dettu quand’era più giovanu. Perchè, avà chì ci pensu… hè vera, dipoi qualchì tempu… m’hè scappatu duie o trè volte !

U Pichju